മൃത്യുശയനം
യൂസഫ്. എ. കെ.
അട്ടം
കറുത്തിരുണ്ട് പൊടിപിടിച്ചു
ഓടുകള് തകര്ന്നു കള്ളന്റെ കണ്ണുകള്
തുറിച്ചു.
മലര്ന്നു കിടക്കുമ്പോള്
കാഴ്ചയുടെ ഫാന്ടസിയില്
കുട്ടിക്കളികള്
കുരുന്നുപൂക്കളില് മഞ്ഞുകണം
വികൃതിയും വാക്കുതര്ക്കങ്ങളും.
മാവിന്ചുവട്ടിലെ ഊഞ്ഞാലാട്ടം
നെല്ലിക്ക, വെല്ലം, പുളി, മാങ്ങ
കുപ്പിവള, പൊട്ടു, മൈലാഞ്ചി
അങ്ങിനെ കൌമാരക്കിതപ്പിലൂടെ
യുവസന്ധ്യകള്, നെടുവീര്പ്പ്
ആഗ്രഹസമസ്യകള്
താലിച്ചരടിലെ തളപ്പ്.
ഓര്മയിലൊഴുകുന്ന നീറ്റലില്
കണ്ണുനീര്ചാലുകള്
ചലനം തോറ്റ മാംസവാര്ദ്ധക്യം
ഉപ്പും മധുരവും കയ്പും നോവും
കേവലം ശവം തീനികള്
കണ്പീലികളില് മിന്നുന്ന ജീവന്.
ഇനിയെത്ര കാതം?
കൈകളില് അഞ്ഞൂറോ അഞ്ചോ
ഹൃദയത്തിന് കാഴ്ച തോറ്റ നേരം
ദൈന്യതയുടെ നീലാകാശം
ജനലിനക്കരെ നീന്തുന്ന പ്രാവുകള്
ഹരിത നിശ്വാസം
ഇതന്ത്യം തേടുന്നൊരബല.
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ